شاعر بزرگ همروزگار ما، استاد میرزا حسین کریمی مراغه ای در کنار مرثیه های پرشوری که در مصائب اهل بیت علیهم السلام سروده است ،بی هیچ شبهه ای از بزرگ ترین طنزآوران روزگار ما نیز محسوب می شود..اشعار طنزآمیزی که ایشان در اوزان عروضی سروده اند به صورتی کم نظیر روان،محکم، شیرین و طنزآمیزند و بیش از نیم قرن است که ورد زبان مردمند.صحبت از استاد کریمی در این مختصر نمی گنجد.با آرزوی طول عمر و سلامت برای این استاد بی بدیل، شعر طنزی از ایشان می خوانیم.
اوغلانلار ایچینده بارک الله بیزیم اوغلان
بیر دسته قزل گول دی ماشا الله بیزیم اوغلان
هچ صنعته علم و ادبه رغبتی یوخدور
بیر درّ گرانمایه دی هیچ قیمتی یوخدور
پاکیزه بیر اوغلان دی فقط غیرتی یوخدور
جرئتده پشیک حیله ده روباه بیزیم اوغلان
اوغلانلار ایچینده بارک الله بیزیم اوغلان
مکتب ندی مذهب ندی مسلک ندی قانماز
وورّام دوگه رم هچ سوزیمه ذرّه جه قالماز
بیر گون اوتوزار بیر گون اوتار هچ ایشیم اولماز
بیر اوددی دوشوب جانیمه واه واه بیزیم اوغلان
اوغلانلار ایچینده بارک الله بیزیم اوغلان
هر دم گوره سن که یوزیمه بیر قاضیلاندی
باش ویرمرم الدن سالارام تازه جواندی
بئینی دولی قاندی هله جاهلدی ناداندی
میخانیه ده تازه تاپوپ راه بیزیم اوغلان
وردوقجا نصیحت گوره سن آغزنی اگدی
بیر سوز دیرم تز گوره سن قلبینه دگدی
بیر پارچا تکبّر، دیسن بس قوری بگدی
افلاک کمالاته اولان ماه بیزیم اوغلان
هر دم دیرم آی بالا بسدور داخی ال چک
گل منله گیداخ مسجده یا مکتبه گوچک
اوچ یاندان آتاللار یوزیمه بوللی توپورجک
گاهی آناسی گاه باجیسی گاه بیزیم اوغلان
هر بیر زادی تکمیلدی اما پولی یوخدور
بیر دایچادی افسوس بلینده چولی یوخدور
بو مرثیه مجلیسلرینه هیچ یولی یوخدور
چوخ قورخورام آخر اولا گمراه بیزیم اوغلان
ایمدی نه ادب وقتیدی بو تازه جوانین
بولمور هله کیفیّتنی یاخشی یامانین
نیلوم بابا وضعی بله دور ایمدی زمانین
اوغلانلارا نسبت گنه والله بیزیم اوغلان
گر گلسه بو بایرام دوزه لر یرمیه یاشی
منله دولانوب ایمدیه تک امر و معاشی
بیر جوت دو قلاسه بوغی بیر بوکسری باشی
باخ گور نجه اوغلاندی سن الله بیزیم اوغلان
باش قوشمارام اصلا ایله گلدی بله گیتدی
تای توشلارینان دوردی قوشولدی چوله گیتدی
میخانیه گیتدی مثلا دندله گیتدی
عیبین دوشونر ایستسه الله بیزیم اوغلان
یومیّه بونون جیره سیدور بش قوطی سیگار
هاردا قازانور هاردا چکور ایلمز اظهار
هاردا اوتورور هاردا دورور آخ نه ایشیم وار
اما دادانوب تریاکا گاه گاه بیزیم اوغلان
اوّلدن ایله خوشلامادی درس کتابی
بیلدی بو یالان علملرین یوخدی ثوابی
ایمدی تاری حفظ ایلیه جیب گیردی حسابی
هر حیله ده هر فنّده آگاه بیزیم اوغلان
آنجاق نگران قالما کریمی کفی سازدی
بیر بیله که تعریف ایلدیم بیل گنه آزدی
بیر خوش دانشان مرت ایلین مسخره بازدی
قاه قاه گنه قاه قاه گنه قاه قاه بیزیم اوغلان!
بیر دسته قزل گلدی ماشا الله بیزیم اوغلان
+ نوشته شده در دوشنبه شانزدهم اردیبهشت ۱۳۹۸ ساعت توسط
|
